Tež lětsa je serbska rěčna wunamakanka online-wothłosowanje dobyła

Budyšin (SN/CoR). Hornjoserbske słowo lěta 2021 su „běrneple“. Dialektna hybrida, wobstejaca ze słowow „běrny“ a „neple“, je so z 24 procentami hłosow přećiwo słowu „naslědnosć“ a požčonce z jendźelšćiny „livestream“ (wobaj 18 procentow) na druhim městnje přesadźiła. „Šćěpiwo“ sćěhuje ze 16 procentami na štwórtym městnje (žane třeće městno).

Na dalšich městnach slěduja słowa „sotra“ (5,2 procentaj), „słuchopisak“ a „pranc“ (wobě 4,8 procentow). Werb „dźenderować“ přizamknje so ze 4,4 procentami. Słowo „žołmołamak“ (2,4 procenty) na předposlednim a prepozicija pře (dwaj procentaj) na poslednim městnje žněještej najmjeńši wothłós mjez wothłosowacymi­.