ST Lubuš

– Sokoł Ralbicy/Hórki II 3:0 (2:0)

Zestawa hosći: Cyž – Bogusz, M. Matka, Šnajder, Kobalc, Serbin, Čórlich, Gerlich, Jakubaš, J. Matka, Wowčerk (46. T. Matka)

Po domjacej poražce přećiwo Łutam wjedźeše jězba koparskeje rezerwy Sokoła do susodstwa Łutowčanow, a to do Lubuša, kotryž bě swoje zašłe tři hry přěhrał. Šansa, duel dobyć, za nju potajkim wobsteješe. Wšitke předewzaća pak so dospołnje nimokulichu. Ralbičenjo dachu sej troje wrota napraskać a přisadźichu nimo toho hišće hrajerja.

Wjedro běše wuběrne a trawnik derje spřihotowany. Jenož hra běše špatna. Prěnju móžnosć wrota docpěć mějachu Sokoljo. Handrij Jakubaš zhłójčkowa bul snadnje pódla wrotow. W 20. min na tamnej stronje klinkaše. Srjedźopólny hrajer bě so z dołhej přihrawku hač na zakładnu liniju předrěł, a wróćohraty bul Matthias Stoyan k 1:0 přetwori. W 39. min. dóńdźe k předrozsudej. Gabriel Čórlich zawini jědnatku, dokelž bě swojemu wrotarjej pomhać chcył. Sudnik pokaza jemu na to čerwjenu kartu. Tak budźe Konječan znajmjeńša dwě hrě pobrachować. Jědnatku Marco Schneider wěsće přetwori.