Wot minjeneho štwórtka přebywa mustwo FC Energije Choćebuz tydźeń w treningowym lěhwje w Awstriskej.

Mjez wšelakimi treningowymi jednotkami běštej tež dwě přihotowanskej hrě. Prěnju hrajachu přećiwo domjacemu prěnjemu ligistej SV Ried. Tutón duel prěni ligist 2:1 doby. Při woběmaj testomaj daše trenar FCE Claus Dieter Wollitz hrajerjow cyły čas hrać, tak zo móžeše woprawdźite dopóznaća wo aktualnym fitnesowym stawje swojich hrajerjow zběrać. Najebać poražku w prěnjej hrě bě z tutym po swójskim wuprajenju dosć spokojom. A to wosebje po druhej hrě přećiwo postupnikej druheje ligi Hertha Wels, kotrehož FCE z wuspěchom 3:1 porazy.

W druhej testowej partiji, kotraž započa so z dźeržanym pokutnym kopom Alexandera Sebalda, ma so wukon Cana Moustfa wuzběhnyć. W ofensiwje bě wón wosebje přez dwoje wrota a wuběrne akcije napadnył. Směmy z toho wuchadźeć, zo 20lětny sobotu, 2. awgusta nimo Tolcayja Ciğercija druhu poziciju w startowym mustwje Energije wobsadźi. Georg Zielonkowski

ST Ried –

FC Energija Choćebuz 2:1 (1:1)