Na zwjazkowej runinje kopańcy su minjeny kónc tydźenja prěnje pokalne koło přewjedli a na nišich runinach dalši dypkowy hrajny dźeń. W krajnej lize su Biskopičenjo doma přećiwo hosćom z Rabensteina 0:3 (0:2) přěhrali a winowatostna dypkowa partija Wocl Riesa – Nowosólc-Hródk skónčichu 4:0 (3:0) za domjacych. Leon Šołta z delnich Sulšec bě hižo w 2. min. 1:0 třělił. W krajnej klasy wothwizdachu derby Wojerowski FC – Natwar Němske Pazlicy njerozsudnje 1:1 (0:1). We wokrjesnej wyšej lize docpěchu w Kulowje njewšědny wuslědk: Po 15 mjeńšinach steješe 0:3, po prěnim połčasu 1:6 a na kóncu 2:7. To bě rezultat partije Kulow – Grossnaundorf z wida hosćićelow. Wrota za worjołow při dezastrje třělištaj Syman Kocor a Louis Kreuz. Dalšej wuslědkaj: ST Hnašecy-Dobruša – SJ Chrósćicy 1:2 (0:1). Wrota třělichu za SJC Alwin Graf a Jan Bogusz. A Sokoł Ralbicy/Hórki – Zeleno-běli Bukecy hrajachu 1:4 (0:0). Čestne wrota za Sokoł docpě Aleksander Wałda. We wokrjesnej lize stafla 2 skónčichu hru Njebjelčicy – Minakał wčera 1:1 (1:0). Hru sćěhował bě Njebjelčan Bjarnat Deleńk: „To bě z našeje strony dobra hra, smy so derje prezentowali.