Awtor dźensa
Stefan Šmit
Mjezynarodny běh w sněhakowanju po dołhich čarach w Drježdźanach je passé. Hačrunjež bě wjedro organizatoram do toho wulke hłowyłamanje wobradźiło, móžemy dźensa prajić, wša próca a napinanje stej so wudaniłoj – premjera bě poradźena. Prěni raz docyła běše sakska stolica štyri dny mekka swětoweje elity sněhakowarjow. Jónkrótna kulisa Drježdźanskeho stareho města z tak mjenowanym Canaletto-widom přiwabi na wurisanskimaj dnjomaj wjacore dźesaćitysacy ludźi, zo bychu sportowcow při čarje pohonjeli. Sym mjez přihladowarjemi tež někotrehožkuli Serba wuhladał, štož mje wosebje zwjeseli. Přetož hdy hewak skići so nam móžnosć, w bliskosći mjezynarodne wubědźowanje w zymskim sporće wopytać resp. zbliska – takrjec live – dožiwić.
