Regionalny finale w lochkoatletice za šulerki a šulerjow je so kónc meje w stadionje na Młynkec łuce w Budyšinje wotměł. Hólcy a holcy Serbskeho gymnazija Budyšin wubědźowachu so w starobnymaj klasomaj U18 a U14 w mjetanju bulika, kulostorku, sprinće, mjetanju hlebije, dalokoskoku, wysokoskoku, běhu na 800 m a w staflowym běhu.

Za hólcy Serbskeho gymnazija Budyšin startowachu Kito Budar, Cajus Wićaz, Ionel Statnik, Matej Statnik, Jurij Kochan, Karl Krječmar, Jakub van Dorp, Dionys Kral a Marek Rajzik. Woni wudobychu sej njewočakowano prěnje městno. Z tym startuja w Freibergu na sakskim finalu. Do mustwa słuša nimo toho Metod Hoza, kotryž so chorosće dla wobdźělić njemóžeše. Marek Rajzik pak jeho z dobrym wukonom na 800 metrach derje zastupowaše. Jakub van Dorp zaměstni so na tutej čarje jako dobyćer z wulkotnym časom 2:18,9 min. Na 100 metrach staj Cajus Wićaz a Kito Budar (12,1 sek. a 12,5 sek.) dypkowy konto mustwa jara derje pjelniłoj. Ionel Statnik skoči 5,35 metrow daloko a z tym najdale w tutej starobnej klasy.