Před 75 lětami, 1951, sta so při mišterstwach Čěskosłowakskeje w pjasćowanju njewšědna wěc: Łužiski Serb Michał Michałk, rodźeny w lěće 1930 w Sulšecach pola Kulowa, wudoby sej w jednej z wahow złotu medalju! W kónčnym boju bě čěskeho přećiwnika Dericha jasnje porazył. Kak bě k tomu přišło? Runja druhim młodostnym bě w ćežkim času po wójnje w susodnym kraju dźěło namakał. W hraničnym měsće Varnsdorfje (Warnoćicy) bě sej w znatym zawodźe Velveće chlěb zasłužił. Michałk so tam pozdźišo woženi a wosta hač do swojeje smjerće w lěće 2006 w měsće. Wjackróć je wězo ródnu wjes wopytał. We Warnoćicach wěnowaše so we wólnym času pjasćowanju. Trenowaše prawidłownje wutrajnje, zasakle. Stopnjowaše swoje wukony, tak zo so přez wobwodne mišterstwo hač k mišterstwu republiki skwalifikowa. W nic mjenje hač 112 bojach wosta njeporaženy! Bjez dźiwa tuž, zo chcychu jeho sportowi funk­cionarojo za lěćne olympiske hry 1952 w Helsinkach nominować. Za to by staćanstwo ČSR přiwzać dyrbjał. Michałk pak nochcyše so staćanskeje přisłušnosće NDR wzdać (zo njeby do čěskeje wojerskeje słužby trjebał).