Wojerowski FC II – SJ Njebjelčicy 1:0 (1:0)
Zestawa hosći: Hahn – Kral, Hanuza, Hoelzel, Šołta (60. Gödig), Korjeńk, Malaškin (73. Ričel), Domš, Čornak, Wagner (55. Lejnart), Plaettner
Za Njebjelčanskich koparjow bě ćežko so tak prawje do hry namakać. Po wotprajenju přihotowanskeje partije w Großröhrsdorfje pobrachowaše jim tróšku hrajerska praksa na kumštnym hrajnišću. Prěnju třělwu na přećiwniske wrota sadźi Leopold Hoelzel po přihrawce Williama Plaettnera (8.). Plaettner sam pospyta so w 20. min. z kromy šěsnatki, ale tohorunja bjez wuspěcha. We 28. min. kiwaše wuspěch přez krasny wólny kop Gabriela Čornaka, domjacy wrotar pak storči bul z wulkotnym zasadźenjom runje tak k róžkej. Tón zhłójčkowa Dennis Wagner snadnje přez łatu. Nětko plećeše so partija přez cyły čas mjez šěsnatkomaj. Tola krótko do přestawki poradźi so Wojerowčanam krasny nadběh přez prawe křidło. Derje do šěsnatki přihraty bul wužiwachu woni hnydom za 1:0.