Lěto 2025 je zas połne róčnicow. Kamjenc je hižo swjećił a w Chrósćicach so jubilejny tydźeń dźensa započina, při čimž smědźeše naše nakładnistwo wčera z premjeru noweje knihi wo Chrósćicach takrjec dočasnje swjedźenski zazběh dać. Ale tež Smolerjec kniharnja je wčera hosći witała, zo bychu zhromadnje druhu róčnicu woswjećili a so na jednu z wusahowacych wosobinow serbskeje kultury dopominali. Wjetšina zwjazuje z nim serbske molerstwo, tola zo běše wón tež wurjadny spisowaćel wosebje na polu publicistiki a pućowanskich reportažow, wo tym móžachu so připosłucharjo wčera přeswědčić. Rěču wo Měrćinje Nowaku, kiž by dźensa 125. narodniny měł. Tójšto atributow je sej wón pisarsce přiswojił abo buchu jemu přidate: Bobak, dundak, wšudźebył a druhe pomjenowanja namakaja so w titlach jeho knihow. Dokal je wšudźe pohladał, móžemy z jeho reportažow zhonić. Čim starši bu, ćim dale jeho pućowanja wjedźechu.