Štó so wo to stara, zo sej mjeńšiny swoju rěč zachowaja? Nimo swójbow, kubłanišćow a institucijow maja nowiny a časopisy mjeńšinow bjezdwěla wulki podźěl na tym. Wone wědźa, zo je rěč dźěl identity, a zo rěč wašnje našeho myslenja formuje. Tym, kotřiž wjacore rěče wobknježa abo je znajmjeńša sćěhować zamóža, je lóšo, druhe ludy a kultury rozumić. To je wulki pokład a wuraz mnohotnosće. Tuž je wažne, zo dóstawaja nowiny a časopisy financielnu podpěru.

Wažna je tohorunja prawidłowna wuměna mjez nowinarjemi. W lěće 2002 bu organizacija Midas załožena. Mjeztym su w njej 27 nowinow mjeńšinow z čłonom. Jónu wob lěto so zastupjerjo nowin na mjezsobnu wuměnu zeńdu. Ćežišćo aktualnych wuradźowanjow je digitalna transformacija. Jasnje je, zo je to wulke wužadanje a zo ma kóžda nowina za sebje prawy puć wuzwolić. Serbske Nowiny tuchwilu zaměrnje na zwoprawdźenju digitalneje transformacije dźěłaja, štož je hoberski nadawk.