Hižo jako dźěćo běch wot kniharnjow a bibliotekow fascinowana. Wěm so hišće derje dopominać, zo sej po šuli prawidłownje z kolesom tam dojědźech, so cyłu chwilu mjez regalemi wokoło šmórach, prjedy hač so skónčnje za jednu abo wjacore knihi rozsudźich. Wěsty čas běch cyle zahorjena wot „Třoch prašakow“ – je to knižny rjad kriminalkow US-ameriskeho spisowaćela Roberta Arthura, w kotrymž třo hólcy w Kaliforniskej wšelake kriminalistiske pady wuslědźeja. Dyrdomdeje młodźinskich detektiwow běch tehdom z wulkim zajimom čitała a tohodla mje wosebje wjeseli, zo w Ludowym nakładnistwje bórze knižka serbskeje trójki „Wćipne nosy“ z pjera Lubiny Hajduk-Veljkovićoweje wuńdźe. To su Hanka, Korla a Lucian, kiž runja mojim ameriskim idolam z detektiwiskej čućiwosću mysteriozny pad rozrisaja. Přeju jim kopicu zahoritych čitarjow a čitarkow, zo by so z toho snadź nowy serbski rjad dźěćacych knihow wuwił.