Wliwapołna podpěraćelka Serbow nowy „Zeleny wobchod“ wotewrěła

Budyšin (SN/mb). „Zeleny wobchod“ w nošerstwje wšelakich zapósłancow Zelenych ma w sprjewinym měsće hižo dołhu tradiciju. K tomu słuša tež wospjetna změna městna. Nětkole je zaso Franziska Schubert na rjedźe, kaž hižo we wólbnej dobje 2014 do 2019. Za zašły pjatk popołdnju je 43lětna předsydka frakcije Zelenych w Sakskim krajnym sejmje, kotraž je w njej tež za serbske naležnosće zamołwita, na wotewrjenje běrowa přeprosyła. Njeje wjace na Sukelnskej, ale při Mosće měra.