Ralbičanska pěstowarnja jedna z prěnich naprawow změny strukturow

Budyšin (SN/BŠe). Pjeć lět zakoń k zesylnjenju strukturow w brunicowych kónčinach mjeztym płaći, a w Sakskej so jara dobre połoženje wotbłyšćuje. To wuchadźa z wotmołwy statneho ministerstwa za infrastrukturu a wuwiće na kraju. Wšitke financne pomocy Zwjazka, kiž běchu za sakske dźěle Łužiskeho a srjedźoněmskeho rewěra za prěnju spěchowansku dobu planowane, budu hač do kónca awgusta přizwolene.

Z tym je zaručene, zo so wšě planowane srědki zakonja we woběmaj rewě­romaj dospołnje za naprawy k wuwiću hospodarskich strukturow nałožuja. Tuchwilu so strategiske wusměrjenje za financnu pomoc druheje spěchowanskeje periody a ewentualne přiměrjenja spěchowanskich modalitow rozjimuja a wothłosuja. Wuslědki maja sčasom do zahajenja druheje spěchowanskeje doby předležeć, kotraž so 1. januara 2027 zahaji.