Što nowa forma woborneje słužby za młodostnych woznamjenja
Budyšin (SN/CeK). Zwjazkowa wobora steji před wulkimi wužadanjemi. Z něhdźe 182 000 aktiwnymi wojakami je daloko wot cilow zdalena, kotrejž je zakitowanski minister Boris Pistorius (SPD) sformulował: Hač do lěta 2035 ma wójsko na 260 000 wojakow rozrosć a rezerwa dyrbi so wot 100 000 na 200 000 wosobow podwojić. Zo móhli to zwoprawdźić, je zwjazkowe knježerstwo naćisk zakonja wo wobornej słužbje wobzamknyło. Zwjazkowy sejm a zwjazkowa rada matej so z tym hišće zaběrać. Pomoc při tym ma naprašnik być, kotryž dóstanje wot lěta 2026 kóždy k 18. narodninam připósłany. Młode žony smědźa jón dobrowólnje wupjelnić. Štóž so na zakładźe wotmołwow kmany wopokaza, toho přeproša na mustrowanje, hdźež přewjedu so wukonowe a lěkarske testy. Štóž je wobsteji, smě wobornu słužbu nastupić. Winowaty pak k tomu dotal njeje. Jelizo ličba dobrowólnych njedosaha, móhł zwjazkowy sejm wobornu winowatosć zawjesć.
