ST Babelsberg

– Budissa Budyšin 0:0

Zestawa hosći: Ebersbach – Kunze, Patka, Hoßmang, Krawčik (61. Milde), Schmidt, Weiß, Pfanne, Müller, Gehrmann (75. Hänsch), Bönisch

Na 12. hrajnym dnju chcyše trenar koparjow Budissy Budyšin Torsten Gütschow na dobre dźěło w škiće při 0:0 w partiji přećiwo Lok Lipskej natwarjeć a nadźiješe so wězo wrotow. W hosćićelskim Karla Liebknechtowym stadionje bě 1 525 přihladowarjow. Trójce hižo běchu Budyšenjo pola ST Babelsberg nastupili, a stajnje su njerozsudnje hrali.

Hosćo spytachu z nadběhami hru postajeć. Šansy Tonyja Schmidta (2., 16.) a Maxa Gehrmanna (9.) pak k wrotam njewjedźechu. Hakle po poł hodźinje mějachu domjacy přez Lionela Sallu prěnju prawu móžnosć. Třělwa pak njebě dokładna dosć. Tež Manuel Hoffmann spyta 1:0 docpěć, ale hłójčkowany bul lećeše nimo wrotow.

W přestawce běštej sej wobaj cyłkaj tójšto předewzałoj. Při tym pak wosta. Nadběhi běchu wšitke přesłabe. Wobaj trenarjej měještaj nadźiju na wrota, ale z toho ničo njebu.