Po wulkotnym lěću z dosć móžnosćemi za bičwolejbul trenowachu Pančičanscy wolejbulisća wot septembra zaso w hali za nowu sezonu. Na prěnim hrajnym dnju čakaštej wustojnej cyłkaj z Budyšina a Chróstawy na klóšterskich muži.
MSV Budyšin 04 IV
– ST Marijina hwězda 1:2
(25:18, 17:25, 9:15)
Hosćićel a přećiwnik prěnjeje hry bě w zašłej sezonje w dobrym srjedźnym polu sobu hrał. Tohodla startowachu Pančičenjo kedźbliwje a snano tež tróšku nerwozni. Wšako běchu jenož dwě treningowej jednotce do toho wotměli. Bórze pak bě spóznać, zo njetrjebaja so chować. MSV njeměješe swoju optimalnu, sylnu šestku na polu. Za prěnju sadźbu wšak su to hrajerjo ST Marijineje hwězdy přepozdźe spóznali.