Boule je znata hra z kulemi, pochadźaca z Francoskeje. Tež w Serbach tónle sport znaja. Clemens Šmit je so z Florianom Kaulfürstom rozmołwjał.
Floriano, poprawom znajemy boule z dowolowych kónčin, předewšěm z Francoskeje abo Italskeje. Wy w Budyšinje pak maće tohorunja móhłrjec cyle aktiwnu scenu, kotraž so za tónle sport hori. Kak da je k tomu dóšło?
F. Kaulfürst: Wokoło lěta 2007 bě dobry Budyski přećel tajki mały set ze šěsć kulemi sobu přinjesł, a tak smy hru prosće wuspytali. Nimo toho dźě běchu w našim přećelskim kruhu njewšědne wólnočasne aktiwity přeco hižo woblubowane. W tym zwisku je často rěč wo tak mjenowanym funsporće. Tajke sportowe družiny maja mjenje wubědźowanski, ale skerje charakter mjezsobneje zwjazanosće. Na přikład su to tež mjetanje frisbeeja a skateboarding. Wosebje dźakowano Budyskemu Kamjentnemu domej móža so młodźi kaž tež starši ludźo we wšelakorych tajkich njewšědnych sportowych aktiwitach wuspytać. A mjez druhim tam hižo někotre lěta tež boule hraja.
