Swoju prěnju testowu hru za nowu sezonu doma přećiwo TSV Wachau přewjedźe koparske mustwo SJ Njebjelčicy hišće bjez noweho trenarja Daniela Pohlinga. Hosćićeljo nawjedowachu zahe přez wrota Handrija Korjeńka (13.). Bohužel pak njemóžachu domjacy tutón předskok dołho dźeržeć a hosćo zwjertnychu hrajny staw hišće do połčasa k 1:2.

Po změnje stron pobrachowaše hosćićelam trěbne přeswědčenje a naposledk tež strašnosć. Tak zwyšichu Wachauscy na 3:1 (60.) a 4:1 (68.). 2:4 w 81. min. wotbłyšćowaše zbytnu hru, dokelž rozsudne situacije prosće fungować nochcychu. Clemens Reinelt třěli bul z połpola do šěsnatki. Flanka bywaše dlěša a dlěša a na kóncu, za wrotarjom, do dołheho róžka wrotow padny. Najebać tutych spektakularnych wrotow wonkowneho škitarja skónči so partija z wida SJN 2:4. Bě to powučny test, kotryž pokaza, zo maja hišće wjele dźěła.