Běłowodźanscy lodohokejisća su minjeny kónc tydźenja hnydom dwaj derbyjej měli. Pjatk hrajachu w Crimmitschauwje, njedźelu doma w Běłej Wodźe­.

Defensiwa dypkaj dobyła

Lodowi piraća Crimmitschau –

Łužiske lodohokejowe liški 2:3 p.p.

(0:0, 1:1, 1:1, 0:1)

W spočatnych mjeńšinach derbyja bě krótke „wottasowanje“ widźeć, prjed hač Lodowi Piraća po dobrymaj mjeńšinomaj wrotarja Liškow Nikitu Quappa dwójce zasobu pruwowachu. Bě to najprjedy wurunana hra, doniž njedyrbješe Philip Ziesche po šěsć mjeńšinach foula dla na chłostansku ławku. Nadběhowarjo hosćićelow ćišć wukonjachu, ale Quapp steješe přeco prawje. Naslědnje dominowachu pola wobeju cyłkow defensiwne rjady. Njebě wjele šansow a hdyž­, potom běše posledni muž na prawym městnje. Při čimž mějachu domjacy strašniše akcije. Najlěpšu móžnosć měješe Thomas Reichel z centralneje pozicije, tola Quapp dźeržeše wěsće. Tak njebě wrotow w prěnich 20 mjeńšinach.