Na turněrje mjez morjomaj njech fanojo našej mustwje podpěruja

Haderslev/Hadersleben (SN/mb). Skupiny za klětušu Europeadu su wulosowane: Serbske mustwo žonow hraje w předkole přećiwo Ladinjankam a Dankam z Južneje Schleswigskeje. Dohromady dźewjeć mustwow koparkow nastupi w třoch skupinach. Serbske mustwo muži budźe swoje mocy w třoch hrach z Němcami z Hornjeje Šleskeje, čěskej resp. słowakskej mjeńšinu z Rumunskeje a z Romami z Rumunskeje měrić. 27 mustwow koparjow hraje w sydom skupinach. Předkołu so na zwučene wašnje tak mjenowane k.o.-koło přizamknje a wězo nimo finala hra wo třeće městno. Pjate europske mišterstwo kopańcy domoródnych narodnych mjeńšin so wot 28. smažnika do 7. pražnika 2024 w namjeznej němsko-danskej kónčinje wotměje. Hosćićeljo turněra su Sewjerni Frizojo, Sintojo a Romojo w Schleswigsko-Holsteinskej, danska mjeńšina Južneje a němska mjeńšina Sewjerneje Schleswigskeje. Nošer turněra je zaso FUEN, najwjetša třěšna organizacija awtochtonych mjeńšin w Europje.