VV Žitawa –

Viktoria Worklecy 3:0

(25:22, 25:12, 25:17)

Za Viktoriju Worklecy zasadźeni: Johanna Fiegler, Fanny Hassemeier, Stefanie Köhler, Christin Opicec, Jennifer Otto, Constance Pötschke, Rejzka Rawšec, Kathrin Spiesec, Tadeja Šefrec; trenarjej: Daniela Kralec a Stephan Mühl

Za lětuši posledni hrajny dźeń podachu so žony prěnjeho zastupnistwa Viktorije Worklecy do Žitawy. Žitawčanki njeběchu njeznaty kontrahent. Hižo z časa wobwodneje ligi stej sej mustwje stajnje na samsnym niwowje mocy měriłoj. Na zašłym domjacym hrajnym dnju su sej Worklečanki dobyće zawěsćili, tutón raz pak wostachu dypki w Žitawje ležo.

Prěnja sadźba bě mjez mustwomaj wurunana. Wobaj cyłkaj zamóžeštej přez sylne nadběhi a zmylki přećiwnika dypkować. W druhej połojcy prěnjeje sadźby wuhra sej domjace mustwo předskok dweju dypkow. Worklečankam pak so přez wuspěšne nadběhi poradźi wurunanje nimale na kóncu sadźby 22:22 docpěć. Tola Žitawčanki přesadźichu so a dobychu prěnju sadźbu.