Wosebity camp Serbskeho šulskeho towarstwa po třoch dnjach zakónčeny

Chrósćicy (JBo/SN). Z turněrom „Europske mini-mišterstwa“ su dźensa popoł­dnju w Chrósćicach třidnjowski koparski camp zakónčili, kotryž bě Serbske šulske towarstwo z.t. (SŠT) w kooperaciji z dalšimi akterami organizowało. Cyłkownje 32 dźěći w starobje dźewjeć do dwanaće lět (młodźina E a D) je so na tutym wosebitym lěhwje wobdźěliło. Nominowali běchu młodych koparjow, kaž tež dwě koparce, trenar wubranki dorosta starobneje skupiny D Tadej Cyž a zamołwići jednotliwych sportowych towarstwow. Hłownu organizaciju campa je Michaela Rabowa, sobudźěłaćerka SŠT za swójbne kubłanje, zhromadnje z Tadejom Cyžom přewzała.