Sokoł Ralbicy/Hórki – ST Hnašecy-Dobruša 3:2 po podlěšenju (0:1; 1:1)

Zestawa domjacych: P. Šołta, Šewc (115. Rawš), Wałda, B. Heidorn – D. Šołta, Mjechela (46. B. Bejma), A. Woko (46. Mikławšk/80. L. Heidorn), Korjeńk (73. R. Šnajder) – N. Šnajder, Hicka (80. Bejmak)

Prěni raz scyła mějachu Ralbičanscy Sokoljo jónkrótnu šansu, sej wokrjesny pokal w swójskim stadionje wudobyć. W minjenych 15 lětach běchu tónle pokal hižo trójce w rukomaj dźerželi a sobotu dyrbjachu přećiwo amtěrowacemu mištrej wokrjesneje wyšeje ligi z Hnašec/Dobruše wobstać. Poprawom wšak měješe so hra njedźelu popołdnju zahwizdać, tola horcoty dla buchu finalne hry młodźinow C, B a A wotprajene. Tuž so mustwje dojednaštaj, finale hižo dźeń prjedy wječor w šesćich wuhrać a k tomu, zo smědźa hnydom šěsć króć hrajerjow wuměnić. Při tajkej horcoće wšak so wokrjesne pokalne finale hišće ženje wotměło njeje, tuž běše to za wšěch hrajerjow njesměrne wužadanje.