Pjaty raz wotmě so sobotu na Worklečanskim sportnišću bičwolejbulowy turněr Captainscup. Tež lětsa běchu wupisane dźesać městnow z časom wuknihowane, štož organizatorow Matthija Šěna, Ludwiga Eckerta a Marcela Rjelku chětro zwjeseli. Samo z Lipska, Kamjenicy a Choćebuza su hrajerjo přichwatali.
Časowy započatk turněra, kotryž steješe prěni króć pod kmótřistwom Alojsa Mikławška, běše na wubědźowanskim dnju hišće tróšku njejasny, dokelž so mócnje kidaše a trawnik sportnišća steješe zdźěla pod wodu. Snano tež hladajo na wjedro stej potom tola hišće dwaj cyłkaj krótkodobnje wotprajiłoj. Ale nalada přitomnych hrajerjow běše najebać to dobra a krótko do 10 hodź. so pomału wuwjedri. Tak móžachu hry dypkownje zahwizdać.