Ralbičanscy Sokoljo na halowym parkeće we Wojerecach třeće městno wobsadźili

Kóžde lěto přewjedźe Zapadołužiski koparski zwjazk (WFV) wokrjesne halowe koparske mišterstwa w starobnej klasy nad 35 lětami. Ličba mustwow bě dotal na wosom cyłkow wobmjezowana. Hrajne zjednoćenstwo Rakecy/Šćeńca, mišter z lěta 2019, pak bě so prawdźepodobnje přepozdźe přizjewiło a wšitke wosom startowych městnow běchu wobsadźene. Zwjazk poda Rakečanam móžnosć hišće dalše mustwo namakać, tak zo bychu turněr wuwzaćnje z dźesać zastupnistwami přewjesć móhli. K tomu pak njepřińdźe a koparjo HZ Rakecy/Šćeńca wostachu doma.

Nowy mišter wuhra so w dwěmaj staflomaj. Kóžda partija traješe 12 mjeńšinow a prěnjej dwě mustwje kwalifikowaštej so za połfinale, kotrež so přez křiž wuhra. Tež za zadnje městna hrajny system płaćeše, tak zo měješe kóžde mustwo pjeć hrow absolwować. Zadnje městna w tutym modusu wuhrać pak žněješe kritiku, dokelž so turněr njetrjebawšo do dołhosće ćehnješe.