Puć do koła 16 najlěpšich dorostowych cyłkow młodźiny w sakskim koparskim pokalnym kole njebě docyła lochki. Nimale wšitke hry běchu napjate a přez dołhi čas jara wotewrjene.
Do prěnjeho regularneho koła bě koparske mustwo Jednoty Kamjenc w předkole přećiwo druhemu zastupnistwu Soccer for Kids Drježdźany nastupiło. Tamniši koparjo su wosebje technisce přeco jara derje wukubłani. Mustwo hraje tež w krajnej klasy, ale w druhej stafli. Po spěšnej a ofensiwnej partiji wobeju cyłkow su so Kamjenčenjo skónčnje ze 7:4 přesadźili.
Dotal najnapjećiši duel za Jednotu bě w prěnim regularnym kole a to w Nowych Jěžercach (Neugersdorf). Mustwo z Hornjeje Łužicy bě w zašłej sezonje mišter sakskeje klasy, stafle wuchod. Po zastatku 0:2 hosćo w poslednjej sekundźe wurunachu. Podlěšenju přizamkny so hišće třělenje z dźewjeć metrow. Tam bě zbožo na boku Kamjenskich hrajerjow, kotřiž po poslednjej přetworjenej třělwje wulce wyskachu.
