Zhubjene a namakane rěčne wosebitosće w inscenaciji NSLDź

Budyšin (SN/MiR). Hdyž so na premjerje dźiwadłoweje hry wopytowarjo wšitkich generacijow wutrobiće směja, potom hodźi so wo inscenaciji rjec, zo je poradźena. „Zhubjene a namakane“, 18. produkcija Serbskeho činohrajneho studija při Němsko-Serbskim ludowym dźiwadle to je. Režiser a nawoda studija Torsten Schlosser wjeseleše so nad wulkej ličbu dźěći wot předšulskeje hač do staroby nad 80 lětami – haj, tež dorosćeni su dźěći –, kiž běchu wčera wječor na předstajenje hry do Budyskeho dźiwadła na hrodźe přichwatali. Mjez nimi běchu přiwuzni hrajerjow, podpěraćeljo kaž tež wjacori profesionelni dźiwadźelnicy, mjez nimi intendant NSLDź Lutz Hillmann. Elewaj Bernadet Šnajdrec w róli Judity a Ole Schmidt jako August staj hižo ze swojim přistupom na jewišćo wutroby wopytowarjow za sebje zdobyłoj, štož je dobry zakład za dalši wuspěch produkcije. Wšako měri so wona, kaž dramaturgaj Torsten Schlosser a Hanka Jenčec wobkrućištaj, w prěnim rjedźe na dźěći wot štyrjoch lět, kiž serbšćinu wuknu.