Dynamo Drježdźany ma tež w Serbach wjele fanow. Po namócnych rozestajenjach mjez přiwisnikami Dynama a Herthy BSC Berlina ćichu sobotu je tež sakski nutřkowny minister Armin Schuster prajił, zo takle dale njeńdźe. Sobotu je wón měrnu hru dožiwił.

Drježdźany (SN/jp). „Hra přećiwo mustwu Herthy z Berlina wisa kaž mječ Damoklesa nad stadionom“, witaše Paddy Fritzsche, komentator ARD, připosłucharjow zašłu sobotu na hru přećiwo Bochumej. Wón skedźbni na wosebite wužadanje za wěstotnu słužbu, policiju a rjadowarjow. Tak běchu mjez fanami domjaceho a hóstneho mustwa wěstotnu conu zarjadowali. W stadionje dźiwaše policija sobu na wěstotu. Tute naprawy wopokazachu so jako wuspěšne. A ultra-fanojo su wulkotnu choreografiju wo wuměłstwje, kulturje a baroku sakskeje stolicy prezentowali.