Premieraj Sakskeje a Braniborskeje šwedski rozsud witataj

Praha/Drježdźany (ČŽ/K/SN). Knježerstwo Šwedskeje je kónc tydźenja tomu přihłosowało, zo statny koncern Vattenfall brunicowe jamy a přisłušne milinarnje, kotrež wón w Němskej wobsedźi, předa čěskej Energijowej a přemysłowej holding (EPH). Šwedski minister za předewzaćelstwo a inowaciju Mikael Damberg k tomu w Stockholmje rjekny: „Kontrakt smy tohodla schwalili, dokelž ma za Vattenfall strategiski wuznam a wobsahuje tež najlěpšu financnu wariantu.“

Z EPH bě so Vattenfall hižo w aprylu wo předani swojich deficitarnych zawodow w Němskej dojednał. Swój čas wustupowaše pak dźěl šwedskich politikarjow přećiwo tomu. We wuchodnej Němskej, ale tež w Šwedskej a Čěskej běchu mócne demonstracije přećiwo transakciji. „Apelujemy na šwedske knježerstwo, Vattenfallej njedać brunicowe jamy a milinarnje towaršnosći EPH předać. Łužiske wuhlo měło w zemi wostać a chěže wobydlerjow tamnišich wsow so zachować“, zwurazni w Praze na akciji w juniju aktiwist Josef Patočka.