Wo słowach prezidenta USA Obamy we Waršawje debata wudyriła

Waršawa. Wopyt prezidenta USA Bara­cka Obamy na wjeršku NATO we Waršawje – předewšěm pak jeho narěč – je přeco hišće wažna tema w pólskich medijach. Při tym dźe hłownje wo prašenje: Što dokładnje je Obama rjekł?

Njewotwisne medije běchu so na tym postorčili, zo ma knježerstwo runje tak kaž předsyda knježaceje strony Prawo a sprawnosć Jarosław Kaczyński narěč Obamy za wulku chwalbu za dźěło pólskeho knježerstwa. Podobnje pozitiwnje rozprawjachu knježerstwu bliske statne medije. Obama bě wospjet nowe pólske zakonje kritizował, na přikład w zwisku z wustawowym sudnistwom. Wo tym pak Kaczyński napřećo nowinarjam ničo wědźeć nochcyše. Nawopak! Wón bě z Obamoweje­ narěče wusłyšał, zo je Pólska cyłemu swětej z přikładom demokratije a swobodnych medijow.

„Nó, da smy dwě wšelakej narěči sły­šeli“, reaguje publicist w interneće. Někotři samo twjerdźa, zo su pólscy toł­mačerjo narěč Obamy wědomje wopak přełožili, zo njebychu so toho kritiske naspomnjenja jewili.