Awtorka dźensa

Tereza Wićazowa

Lětuše swětowe koparske mišterstwo je hač dotal najwjetše mišterstwo scyła. Wšitke tajke zarjadowanja žiwja so tež ze stawiznami pódla poprawneje hry. Tu někotre zajimawostki: Norwegske narodne mustwo postara so hižo do turněra wo zahoritosć. Wone wozjewi mjenujcy tři wosebite mustwowe fota. Na prěnim běchu wšitcy hrajerjo jako wikingojo zwoblěkani – hommage na stawizny swojeho kraja. Dalši je oficielny mustwowy wobraz w trikoće narodneho mustwa a na třećim běchu wšitcy hrajerjo w trikoće swojich prěnich towarstwow. Z tym dopominaja na swoje spočatki w kopańcy. Po swojim wosebitym WM-debiće přećiwo Curaçao wza sej Felix Nmecha čas za swoju wěru: Zhromadnje ze swojim mustwowym kolegu Janathanom Tahom kaž tež z wjacorymi koparjemi přećiwneho mustwa stupi so 25lětny na hrajnišću do kruha a modleše so z nimi hromadźe. Japanska pokaza znowa wokomik respekta zboka hrajnišća. Po prěnjej WM-hrě su předrasćernje kaž tež tribuny čisće, bjez wotpadkow zawostajili.