Srjedźowěkowske słowjanske wobydlerstwo na baltiskim přibrjohu dźensnišeje Němskeje bu wot 12. lětstotka poněčim asimilowane. W kónčinach dźensnišeje sewjerozapadneje Pólskeje pak su tući pomorjenjo najebać lětstotki trajace germanizaciske wliwy přetrali a wuwichu so do populacije Kašubow. Z jich wobstatkom běše hač do połojcy 20. lětstotka tež wosebita etnografiska podskupina Słowińcy (kiž njesmě so z južnosłowjanskimi Słowjencami zaměnjeć). Dźensa nachadźamy Kašubow, etniskorěčnu skupinu ze specifiskej materielnej kaž tež duchownej kulturu, zapadnje města Gdańsk při Baltskim morju pola połkupy Hel kaž tež w lěsojtym kraju we wokolinje městow Kartuzy (kašubsce Kartuzë) abo Wejherowo (Wejrowò). Jich rěč, kašubšćina, so hladajo na specifiski pochad Kašubow kaž tež sylnych wliwow němčiny dla chětro wot pólšćiny rozeznawa. Tohodla ju rěčespytnicy najhusćišo jako wosebitu zapadosłowjansku rěč wobhladuja. Najebać to su linguisća kaž tež statne organy w Pólskej kašubšćinu dołho jenož jako skupinu pólskich narěčow hódnoćili.