Prěni raz Serbja na festiwalu mjeńšinow w Liberecu zastupjeni byli

Liberec (SN/MiR). W Liberecu so hižo 15 lět festiwal mjeńšinow wotměwa. Na njón su kóžde lěto zastupjerjo narodow a ludow přeprošeni, kotřiž w Čěskej republice bydla. 15 narodow je so lětsa pod lětdźesatki starymi štomami w parku palasta Liebieg w Liberecu zešło. Swoju kulturu a swoje stawizny prezentowachu na wuwěšku z krótkimi informacijemi wo swojej narodnej mjeńšinje. Wosebje wabjace pak běchu kulinariske chłóšćenki, kotrež sta hosćom poskićowachu. „Nam je wažne, zo so mjeńšiny, kotrež mjeztym hižo lětdźesatki našu towaršnosć tworja, mjez sobu zeznaja. Trjebamy akceptancu a tolerancu jedyn druhemu napřećo, zo bychmy předsudki wottwarili a tak w měrje žiwi byli“, rjekny zastupowaca jednaćelka komunikaciskeho centruma w Liberecu Marie Matičková.