Liberec. Dohromady 27 šulerkow a šulerjow 7. lětnika Budyskeho Serbskeho gymnazija je sej před tydźenjomaj na wulět do zwěrjenca w Liberecu dojěło. Wopyt so wuběrnje k aktualnym wobsaham wučby hodźeše a běše nimo toho dobra móžnosć, zwěrjata w jich žiwjenskim rumje a nadawki moderneho zwěrjenca bjezposrědnje zeznać. Najebać najprjedy skerje njepřihódnu wjedrowu prognozu mějachmy wulke zbožo: Hač do popołdnja swěćeše słónco, tak zo móžachmy zwěrjenc při přijomnym wjedrje wotkrywać. Tamjězba wšak wopokaza so jako woprawdźite wužadanje. Na železniskej čarje mjez Žitawu a Habrachćicami dyrbjachu padustwa kabla dla narunanski wobchad zasadźić. Přez to podlěši so planowany jězbny čas wot dweju hodźin na tři hodźiny.