Wolejbulowe mustwo Wyšeje šule „Korla Awgust Kocor“ Kulow smě so skónčnje nad nowymi trikotami wjeselić. Naposledk móžachu so tamniši wyši šulerjo Tobias Crüger (kapitan), Alexander Heinz, Henning Schreiber, Louis Kreuz a Toni Stache na wolejbulowym turněrje přesadźić a hrajnišćo jako dobyćer wopušćić. Po tym zo běchu wolejbulisća 7. lětnika wuspěch euforisce wozjewili, přilubi jim šulski socialny dźěłaćer Philipp Schwabe nowu sadźbu sportowych košlow. Šulerjo wězo njepopušćichu, přilubjene bě přilubjene.
Tak su sportowy wučer Sven Holweger, něhdyši FSJnik Lucas Franz a šulski socialny dźěłaćer Philipp Schwabe wšitke kóšty přewzali. „Myslu rady na čas swojeho dobrowólneho socialneho lěta w Kulowskej wyšej šuli. Rady so dale za šulerki a šulerjow angažuju“, podšmórny mjeztym w Drježdźanach bydlacy student wučerstwa Franz.