Hač w kopańcy, wolejbulu abo dalšich sportowych družinach, wjele mustwow so w treningowych lěhwach na nowu hrajnu dobu hotuje. Podobnje je tomu tež w jěchanskim sporće. Na jěchanskich dalekubłanjach poskićeja jěcharkam a jěcharjam trening, zo móhli so na nowu sezonu přihotować.

Tak je tež Jěchanski klub Kamjenc kónc februara a spočatk měrca hnydom dwaj treningowej kóncaj tydźenja w jěchanskimaj disciplinomaj skakanje a dresura zarjadował. Wobaj razaj běchu konjacy sportowcy z hosćom w Grafec jěchanskej hali w Jěžowje. Trenar za dalekubłanje bě Hardy Heckel. Wón ma swójski konjacy dwór w Lengenfeldźe, hdźež sam konje za wukonowy sport plahuje. W swojim aktiwnym času je Heckel wuspěšnje hač do ćežkeje klasy jěchał. Tak je w Jěžowje kónc februara swoje nazhonjenja a kmanosće dohromady 22 jěcharkam a jěcharjam posrědkował.