Madlenka Cyžec a Anastasia Rauerec stej so z kopańcu žonow zaběrałoj

Budyšin. Skónčnje zaso tak daloko je, europske mišterstwo žonow w kopańcy so tuchwilu w Šwicarskej wotměwa. Ale wotbłyšćuje so wubědźowanje tež w zjawnosći, kaž tole wot mišterstwa muži znajemy? Z tutej temu so w prózdninskim dźěle rozestajichmoj a prašachmoj so młodostnych, kotřiž aktiwnje kopańcu hraja. Při naprašowanju spěšnje zwěsćichmy, zo su měnjena rozdźělne.

Marta Handrikec z Dobrošic hry EM žonow sćěhuje, wšojedne hač němske abo druhe. Měni, zo je niwow koparkow w běhu lět přiběrał. Wona připóznawa, zo je so wid Šwicarjow na kopańcu žonow europskeho mišterstwa w swójskim kraju dla polěpšił. W němskej ludnosći je drje kopańca žonow trochu prezentniša. Tola zdobom Marta Handrikec z toho wuchadźa, zo njebudźe nihdy tak popularna kaž kopańca muži.