Wot lěta 2016 wobdźěla so stara garda Sokoła Ralbicy/Hórki na winowatostnych hrach wólnočasneje koparskeje ligi Zapadołužiskeho koparskeho zwjazka. Ralbičenjo wuhraja hry na wulkim polu. Móža pak hry tež na małym polu w druhej stafli wuhrać.

Cyłkownje je so dźewjeć mustwow za wulke hrajnišćo přizjewiło a wo dypki hrało. Nažel pak njeje čas dosahał, zo bychu dwójne koło wuhrali, wšako so w prózdninach njehraje. Tuž rozsudźichu so zamołwići zaso za jednore koło z nowostku. Prěni štyrjo wuhraja tak mjenowane play-off-hry přećiwo sebi, zo bychu tak mištra zwěsćili. Dypki, kotrež sebi prěni štyrjo wuhrachu, su do noweje tabulki přewzali. Te samsne liči za po­slednich pjećoch. Woni wuhraja tam městna 5 do 9.

Tuž běše dobry start wězo wažny, a na twjerdym hrajnišću so tón tež poradźi. Ralbičenjo dobychu doma 3:0 přećiwo Horam. Tež druhu hru we Wojerecach dobychu.