Křižerjo smědźa poselstwo wo zrowastanjenju Jězusa Chrystusa na konjach zaso wozjewjeć. Dźiwać pak maja we wšitkich procesionach na krute postajenja hygieny.
Budyšin (SN/JaW). W Hornjej Łužicy – w Budyskim kaž tež Zhorjelskim wokrjesu – mócne „haleluja“ křižerjow lětsa zaso zaklinči. Wčera wječor rozsudźi to Budyski krajnoradny zarjad na wuradźowanju z hłownymi zamołwitymi jednotliwych procesionow. Kaž je prěni přirjadnik krajneho rady Udo Wićaz (CDU) po wuradźowanju w Budyskim krajnoradnym zarjedźe medijam zdźělił, bě zakład rozsuda, zo smědźa so křižerske procesiony wotměć, prawo wo swobodźe wěrywuznaća. „Njeńdźe wo někajku show, njeńdźe wo wjeselo a turizm a tež nic wo tradiciju, štož hišće raz jasnje wuzběhnu. Dźe wo to zaručić zakładne prawa, kotrež su w artiklu 4 Zakładneho zakonja zapisane, mjenujcy swobodu wěrywuznaća, runje tak kaž so při demonstracijach mnozy na swobodu zhromadźowanja powołuja, a tajku dyrbimy w tymle času tež dowolić“, Wićaz rozłoži.
