Awtor dźensa

Clemens Šmit

Jich móžeš takrjec jako kruty zdónk towaršnosće, wosebje našich towarstwow wopisować. W prěnim rynku lědma steja a dźakujemy so jim přemało. Woni pak su trěbni, haj eksistencielni. Rěču wo ludźoch, kotřiž so čestnohamtsce angažuja. Hač we wohnjowej woborje, w gmejnskej radźe abo w sportowych towarstwach. Bjez nich njeby wjele šło. Něhdźe 29 mio. ludźi w Němskej to je, nimale 40 procentow cyłkowneje ludnosće. Tola jich ličba w zašłych lětach sylnje woteběra! Tež w sporće. W tutym wobłuku angažuje so přeco hišće najwjace ludźi, wosebje w sportowych towarstwach, jako trenarjo, poradźowarjo abo sudnicy, tola tež tu so straty pokazuja. Što so stanje, hdyž čestnohamtski angažement móžny njeje, je wosebje čas korony pokazał. Trening, zwučowanja, sportowe wubědźowanja, wšitko to je sylnje woteběrało.