Sokoł Ralbicy/Hórki –

ST Horni kraj Sprjewja 3:2 (0:0)

Zestawa domjacych: Schöne – B. Heidorn, Šewc, Wałda, L. Heidorn (70. Rachela), Gloxyn, Mjechela (60. Mikławšk), Bejmak, Bejma, Šnajder (88. Šołta), Domaška (70. Korjenk)

Na předposlednju domjacu hru witachu Sokoljo mustwo z Hornjeho kraja. Do hry mějachu hosćo jenož dwaj dypkaj mjenje hač Ralbičenjo. Kaž hra dopokaza, njeběše to lochki přećiwnik a domjacy cyłk dyrbješe znowa jara wjele inwestować, zo by sej dypki w Delanach zdźeržał.

Hnydom w prěnjej mjeńšinje mějachu Ralbičenjo jara dobru składnosć. Niklas Šnajder bu swobodnje hraty a měrješe so sam na wrotarja. Potom pak so rozsudźi bul Pětrej Domašce wothrać, tak zo wrotar hišće wuspěšnje zakroči. Šnajder by dyrbjał sam wotzamknyć. Hosćo zapisachu na lisćinu šansow strašny wólny kop. Grohmann pak zhłójčkowa kulowatu kožu wyše wrotow. Na tamnym boku pokazachu Sokoljo swoju strašnosć po róžku, tola wrotar běše spušćomny. Po poł hodźinje skićeše škit Sokoła hosćom přewjele ruma. Jónu dźěše třělwa wyše wrotow a w přichodnym nadběhu jich žerdź wuchowa. Bjez wrotow dźěše tuž do kabiny.