Hajko Kozel: W statistice antiserbskich njeskutkow je jenož dźěl padow

Drježdźany (SN/mb). Hajko Kozel so hišće na čas dopomina, hdyž je policija wonječesćenje Božich martrow a swjatych křižow jeničce jako wobškodźenje wěcy klasifikowała. Něhdyši wjelelětny zapósłanc Lěwicy w Sakskim krajnym sejmje ma to za postup, zo so mjeztym policajski wotrjad „škit stata“ antiserbskim njeskutkam wěnuje. Na prašenja Rica Gebhardta (Lěwica) za njeskutkami přećiwo Serbam a jich kulturje a zarjadnišćam je sakske nutřkowne ministerstwo njedawno z naličenjom 21 antiserbskich njeskutkow wot lěta 2022 hač do dźensnišeho wotmołwiło. Klasifikuje je jako „politisce motiwowanu kriminalitu“.

17 padow zastopnjuja jako prawicarske, jedyn pad jako lěwicarski: wothódnoćacy popis na Serbskim domje w Budyšinje (12./13.12.2022). Dale bu w Budyšinje awto čłona Domowiny manipulowane (21.6.2022, na kolesach buchu šrubiki powólnjene), před Němsko-Serbskim ludowym dźiwadłom bu škleńčana witrina wobškodźena (7./8.8.2022) a w Radworju buchu do chata wustawje so spřećiwjace symbole a antisemitiske a rasistiske wobsahi zapodate (1.7.– 31.7.2023).