Najlěpši serbski koparski cyłk muži běše w zašłych wosom hrajnych dobach wot 2016/2017 do 2023/2024 prěnje koparske mustwo SJ Chrósćicy, jako hraješe wone wuspěšnje w krajnej klasy.

Sezonu 2024/25 pak su koparjo Sokoła Ralbicy/Hórki jako najlěpše serbske mustwo na šestym městnje we wokrjesnej wyšej lize zakónčili. 43 dypkow sej hrajerjo trenarja Krystofa Gloxyna w 30 partijach cyłkownje wudobychu. Tute wuchadźachu z jědnaće dobyćow a 13 njerozsudnych partijow, štož je rekordna ličba. Tele mnóstwo hodźi so z wrotowym poměrom Sokołow rozjasnić. Z jenož 33 napřećiwnymi wrotami mějachu Ralbičenjo za mištrom z Němskich Pazlic druhi najlěpši škit ligi. Za to pak je w nadběhu hišće klacało, na čož pokazuje jenož 48 wrotow. Nimo toho běchu so Ralbičanam tři dypki wotćahnyli, dokelž trěbnu ličbu sudnikow njespjelnichu.