Serbja a queerni bórze zhromadnje do zakładneho zakonja?

Kiel/Berlin (SN/mb). „Ani SSW njebu informowany“, praji nowinski rěčnik Južnoschleswigskeho wolerskeho zwjazka (SSW), Per Dittrich, wčera na naprašowanje Serbskich Nowin. „Daniel Günther je politiski momentum wužił, a to je mudre.“ Lětsa w lěću je ministerski prezident Schleswigsko-Holsteinskeje njejapcy připowědźił, zo chce namjet, „narodne mjeńšiny a ludowe skupiny do zakładneho zakonja přiwzać“, kotryž běchu Schleswigsko-Holsteinska, Sakska a Braniborska za zwjazkowu radu přihotowali, zaso na dnjowy porjad přinjesć. Zašłu póndźelu je politikar CDU, kiž w zwjazkowym kraju mjez morjomaj koaliciju swojeje strony ze Zelenymi nawjeduje, krajny sejm oficialnje wo tym informował a přichodny pjatk ma zwjazkowa rada wo tym rozsudźić.