Budyšin (SN/bn). „Prěni lětdźesatk nakładnistwa Maćicy Serbskeje – Projekty, problemy, wunoški“ bě nadpismo přednoška, z kotrymž dr. Franc Šěn minjenu srjedu nowu sezonu rjadu Maćična akademija w Budyskim Serbskim domje zahaji. Załoženje towarstwa w lěće 1847 bě „jedyn z najwažnišich skutkow serbskeje historije“, citowaše wón na spočatku Michała Hórnika. Dale doda, zo mějachu Serbja wot toho časa „z hłownymi zhromadźiznami nadkonfesionalny diskusijny forum za narodne naležnosće“. Mjez wusahowacymi wuslědkami tychle zažnych zeńdźenjow bě wutworjenje prě­njeho serbskeho nakładnistwa. Serbske knihi su drje hižo do toho wudali, to pak nimale bjezwuwzaćnje nabožneho razu – hinaše publikacije njeběchu němskim knihićišćerjam lukratiwnje dosć. Nakładnistwo Maćicy bě tuž z pućrubarjom ­moderneho pismowstwa, kotrež „spyta zaměrnje wuwiwać serbsku rjanu a wěcnu literaturu“. Do zazběha publikaciskeje dźěławosće wšak mějachu so Maćicarjo najprjedy na to dojednać, što chcedźa scyła po kotrym prawopisu a w kotrym pismje za koho wudawać.