Přehladujo swój sportowy archiw storčich na předležace foto. Zwěsćich, zo je wobraz mjeztym hižo 60 lět stary. Na jeho stawiznu so přiwšěm dopominam:
Serbske sportowe zjednoćenstwo Rotacija, kiž bě so w lěće 1958 w Budyšinje załožiło, wuhotowaše kóžde lěto zhromadny sportowy swjedźeń z přistajenymi serbskich institucijow města. Na rozdźělnych městnach wotměwachu so wubědźowanja we wjacorych sportowych družinach. Tež žony so na tym wobdźělichu, wone so na přikład na sportnišću Ludoweje policije na Kantowej lochkoatletice abo tež masowej gymnastice wěnowachu.
K programej lěta 1965 słušeše přećelska kopańcowa hra mjez Budyskej serbskej wubranku a mustwom redakcije Lausitzer Rundschau z Choćebuza. Zetkanje wotmě so w Humboldtowym haju.
