Wuměłcy „dejmantnje“ wotrěznyli

Freitag, 17. Februar 2017
Artikel bewerten
(0 Stimmen)
Scena z lětušeho ptačokwasneho programa SLA  Foto: SN/Maćij Bulank Scena z lětušeho ptačokwasneho programa SLA Foto: SN/Maćij Bulank

Ptačokwasny program 2017 Serbskeho ludoweho ansambla

Hač je radźomne, sej ptačokwasny program našeho Serbskeho ludoweho ansambla wobhladać? Dojědźech sej do Radworskeje „Slavije“, a praju hnydom zawodnje: Ansamblowcy su mje lětsa­ překwapili. Z „Ptačokwasnej polku“ Jana Bulanka na tekst Cyrila Kole, z reju po choreografiji Juraja Šiški, z tradicionalnym „Hlejće, nowa wěc so stała“ wotbych wšitke stysknosće. Wot prěnjeho zynka su wuměłcy SLA z połnymi płucami hudźili, spěwali, rejowali. Z prěnim programowym dypkom přeskoči škrička zahoritosće z jewišća na publikum. To bě woheń na jewišću wot spočatka a ze spochi so stopnjowacymi wukonami wšěch akterow.

Što bě to najlěpše z najlěpšeho? Mój prěni faworit: Hakle po programje so mi poradźi z programoweho zešiwka z jara małym­ pismom wučitać, zo mjenuje so „Europska­ jědźna karta“. Jewišćo změni so na hosćenc, a braška sedźi za blidom. Wón ma po jědźnej karće jěsć. Nanoša jemu jednu jědź po druhej, ze wšěch móžnych krajow, k tomu wotpowědnje zaklinčitej muzika a spěw a rejuje balet. „Jědźna karta“ je multikulti, wotmołwa na aktualne prašenje.

Lětuši ptači kwas SLA bě dypkowy program wot Jurja Winarjoweho spěwa „Słónčko a kwětki“ hač ke kónčnemu wobrazej z Kocorowym/Zejlerjowym „Derje derje, je na zemi, lubosć dawać, lubosć brać“! Klasika w estradowym programje! Radźene to předstajenje, zo je sej publikum da capo wužadał.

Njeje scyła tak lochko wjerškowe dypki pomjenować, hdyž bě nimale wšo wjeršk? Spytam, po swojim słodźe. „Štyri pory běłych koni“. Tekst je Ludwik Kola z čěskeho přełožił, za Bena Njekelu je zbasnił „Prěnju lubosć“. Njekela je k tomu krasnu hudźbu stworił. Charleston, wot Dietera Kempy skomponowany, bě rejwarjam kaž publikumej lute wokřewjenje. Mi je było, kaž bychu rejwarjo cyły program za wokřewjenje měli, byrnjež so njesměrnje napinać dyrbjeli. Wokřewiłoj stej mje tež dušu hrějacy pólski­ ludowy­ spěw wo Chłopokach a přede­wšěm muski chór ansambla z dalma­tinskej pěsnju „Plowi barka“. To běše wosebita chłóšćenka.

Hnydom po tym „Cyganska reja“! Prašam so, na kotrym jewišću w Němskej ći tajki zapal skića, telko žiwjenja. Tale reja, tak předstajena, je kaž powědka w formje short story. Program so poněčim nachila, ale dyrbju hišće jedne stopnjowanje wuzběhnyć, tež toho­dla, dokelž je načasneho razu: Měrćina Weclicha ze šlagrom „Žiwjenje dźe dale“. To njeje jeno šlager, mi je to stork, nastork, snadź nic jenož mi. Jeli něchtó prawje­ njewě, što francoske słowo ‚nonchalant‘ woznamjenja, dyrbi dožiwić Měrćina Weclicha. Kak wón na jewišćo přińdźe, z krótkej sadu sebje přizjewi a z miknjenjom k dirigentej startuje – to słuša do profesionalneho wuměłstwa wysokeho schodźenka. Spěwa kaž bjez napinanja, z přijomnym hłosom a jara derje zrozumliwym tekstom. Za mnje je pola njeho wšo perfektne, hač k šibałemu posměwkej. Pytnu, zo so derje čuje pod přewodom orchestra z dirigentom Andreasom Pabstom.

Program zestajeć a při tym doprědka widźeć, z kotrym dypkom da so stopnjować, je so aranžeram połnje po­radźiło. „Wulkotny, wurjadny, wjesoły, ani­ kuska wostudły“, bě po programje w Radworju słyšeć. A k tomu spokojne mjezwoča. Snadź so zadomi do serbskeje rěče za adwerb wulkotnje nowy synonym: dejmantnje.

K dejmantnemu wukonej je přino­šowało jasne wurjekowanje braški Jurja Šimana. Kóžde słowo bě zrozumliwe. Z lochkim a druhdy spěšnym jazykom je sej wón sympatiju publikuma zdobył, tež z wobsahom swojich słowow. – Naspomnjenjahódna bě runje tak precizna technika: wobswětlenje a zwuk,­ jasny tež tón wysokeje frekwency.

Štož njebě přewidźeć: Do „Slavije“ by 50 ludźi wjace nutř šło. A jeno za blidom sedźacy publikum njenaruna přihladowarski blok. Tón pak wuměłcy trjebaja. Ja znajmjeńša přeju ansamblej dale wjele přihladowarjow. Tež wšelki druhi móhł za tajki program wabić. To je prašenje organizacije­. Křesćan Krawc

Veröffentlicht in Kultura & wuměłstwo
Bitte anmelden, um einen Kommentar zu posten

Anzeige