Zhromadna pućowanska wustajeńca pjeć ludowych a rěčnych skupin

Berlin (SN/bn). Pod hesłom „Što rěka tu mjeńšina? Danojo, Frizojo, němscy Sintojo a Romojo, Serbja a rěčnicy delnjoněmčiny – Twoji njeznaći susodźa?“ bu wčera wosebita pućowanska wustajeńca w Berlinskim Domje Paula Löbeho wirtuelnje wotewrjena. Wona je zhromadny projekt Mjeńšinoweho sekretariata štyrjoch w Němskej připóznatych awtochtonych ludowych skupin a Zwjazkoweje rady för Nedderdüütsch. Kurator je wědomostny sobuddźěłaćer Serbskeho instituta dr. Robert Lorenc. Zaměr přehladki je, „wobhladowacym narodne a rěčne mjeńšiny Němskeje zbližić, načasny dohlad do jich žiwjenja, kultury a rěče po­srědkować, klišeje pokazać a snano wu­wróćić a změnu perspektiwy zmóžnić“, kaž w oficialnym wopisanju rěka.