Z podijoweje diskusije k pućowanskej wustajeńcy w zwjazkowym sejmje
Berlin (SN/at). „Finisaža njeje kónc, ale zazběh wuspěšneje jězby našeje pućowanskeje wustajeńcy po republice.“ Słowa Gitte Hougaard-Werner, předsydki Mjeńšinoweje rady štyrjoch awtochtonych mjeńšin a ludowych skupin Němskeje, su wčera na finalnym zarjadowanju w Němskim zwjazkowym sejmje nowotarske wuchadźišćo wšitkich na nastaću interaktiwneje ekpozicije „Was heißt hier Minderheit?“ wobdźělenych wobkrućili. Dopóznaće, z předstajenjom Danow, Frizow, Sintowa a Romow kaž tež Serbow wjetšinje ludnosće w kraju husto schowanu bohatosć wotkrywać móc, je so w podijowej diskusiji wotbłyšćowało. Tam je němski žurnalist ze Sewjerneje Schleswigskeje Jan Diedrichsen z parlamentownikami-čłonami wuběrka za nutřkowne a domiznu perspektiwy a wužadanja za nowu wólbnu periody zwjazkoweho sejma rozjimał.
