„Kontrasty“ by so wuběrnje jako hesło aktualneje wosebiteje wustajeńcy „Europske wuměłstwo – sztuki europiejskie“ w Budyskim Kamjentnym domje hodźało. Na kontrasty bohate čornoběłe fotografije najwšelakorišich přirodnych resp. přirodowych zjawow a fenomenow steja runje tak na kontrasty bohatym wobrazam (zdźěla hoberskeho architektoniskeho) zawostajenstwa čłowjeka napřećo. Čłowjek sam so nimale njejewi, štož spožča předewšěm impresijam z městow, hrajkacym so ze swětłom a sćinom, fascinowacy surealistiski raz.